ಬೆಳಗಲಿವೆ ಪ್ರಥಮ ಪ್ರಭಾತದ ಹೊಂಗಿರಣಗಳು

ಸುಮಾರು ಭಾರತ ಭೂಭಾಗದಿಂದ ಎಂಟು ಸಾವಿರ ಕಿ. ಮೀ. ದೂರದ ಆಕ್ಷೇಯ ಏಷಿಯಾದ ಭೂಖಂಡದಲ್ಲಿ ಹಿಂದು ಸಾಮ್ರಾಜ್ಯವೊಂದು ಸ್ಥಾಪಿತಗೊಂಡಿತು. ಅದು ಎರಡನೇಯ ಕ್ರಿಸ್ತ ಶತಮಾನದ ಕಾಲಖಂಡ, ಚೀನಾದ ಗ್ರಂಥಗಳಲ್ಲಿ ಇದು ಮುನಾನ್ ಸಾಮ್ರಾಜ್ಯವೆಂದು ಉಲ್ಲೇಖವಾಗಿದೆ. ಮುನಾನ್ ಎಂದರೆ ಪರ್ವತ ಎಂದು ಅರ್ಥ. ಈ ಸಾಮ್ರಾಜ್ಯದ ಸ್ಥಾಪಕರು ಭಾರತದ ವಸಿಷ್ಠ ಋಷಿಯ ವಂಶಜರಾದ ಋಷಿ ಕೌಂಡಿಣ್ಯರು. ಅವರಿಂದಾಗಿ ಆ ದೇಶದ ಹೆಸರು ಕೂಡಾ ಕಾಂಬೋಡಿಯಾ ಎಂದಾಯಿತು. ಕೌಂಡಿಣ್ಯ ಋಷಿ ಅಲ್ಲಿಯ ರಾಜಕುಮಾರಿಯನ್ನು ವಿವಾಹವಾದರು. ಆಕೆ ನಾಗಾ ಜನಾಂಗದವಳು. ಈ ಋಷಿ ದಂಪತಿಗಳ ವಂಶಜರು ಕಾಂಬೋಡಿಯಾವನ್ನು 150 ವರ್ಷಗಳ ಕಾಲ ರಾಜ್ಯವಾಳಿದರು. ಈಗಲೂ ಅಲ್ಲಿ ರಾಜವಂಶದ ಸಂಕೇತವಾದ ನಾಗಪ್ರತಿಮೆಗಳು ಹೇರಳವಾಗಿ ಕಾಣಸಿಗುತ್ತವೆ.

ಕಳೆದ ತಿಂಗಳು 21ರಂದು ಕಾರವಾರದ ಕದಂಬ ನೌಕಾನೆಲೆಯಲ್ಲಿ ವಿಶಿಷ್ಟವಾದ ಹಾಯಿಪಟದ ನೌಕೆಯೊಂದು ನಿರ್ಮಾಣವಾಗಿ ಲೋಕಾರ್ಪಣೆಗೊಂಡಿತು. ಅದಕ್ಕೆ ಇಟ್ಟ ಹೆಸರು ಭಾರತದ ಸಮುದ್ರಯಾನದ ಪ್ರವರ್ತಕರಲ್ಲಿ ಒಬ್ಬರಾದ ಇದೇ ಋಷಿಯ ಹೆಸರು ಕೌಂಡಿಣ್ಯ ಎಂದು. ಭಾರತದ ಸಮುದ್ರವ್ಯಾಪಾರದ ಪ್ರಾಚೀನ ಪರಂಪರೆಯ ನೆನಪನ್ನು ಮರುಕಳಿಸಲೆಂದೇ ಪ್ರಾರಂಭವಾದುದು ಈ ನೌಕಾನಿರ್ಮಾಣ ಯೋಜನೆ.

ಹರಪ್ಪಾದ ವ್ಯಾಪಾರಿಗಳು ಮೆಸಪೋಟೋಮಿಯಾದೊಂದಿಗೆ ವಾಣಿಜ್ಯ ವ್ಯವಹಾರಗಳನ್ನು ಇಟ್ಟುಕೊಂಡಿದ್ದರು. ಅನಂತರದಲ್ಲಿ ಪಶ್ಚಿಮ ಭಾರತದ ಸಮುದ್ರ ವ್ಯಾಪಾರದಲ್ಲಿ ಮುಂದಿದ್ದುದು ದ್ವಾರಕೆಯ ಬಂದರು. ಮೌರ್ಯರ ಕಾಲದಲ್ಲಿ ಬಂಗಾಳದ ತಾಮ್ರಲಿಪ್ತಿಯು ಸಮೃದ್ಧ ರೇವು ಪಟ್ಟಣವಾಗಿದ್ದಿತು. ಆಗ್ನೆಯ ಏಷಿಯಾ ಮತ್ತು ಚೀನಾದೊಂದಿಗೆ ವ್ಯಾಪಾರದಲ್ಲಿ ಒರಿಸ್ಸಾದ ಕಟಕ್, ಪಲ್ಲವರ ಮಹಾಬಲಿಪುರ ಮತ್ತು ಚೋಳರ ನಾಗಪಟ್ಟಣಗಳು ಮುಂಚೂಣಿಯಲ್ಲಿದ್ದವು. ಅತ್ತ ಸುವರ್ಣ ದ್ವೀಪವಾಗಿದ್ದ ಸುಮಾತ್ರಾ, ಯವ ದ್ವೀಪವೆಂದು ಕರೆಯಲ್ಪಡುತ್ತಿದ ಜಾವಾಗಳು ಸೇರಿದಂತೆ ಈಗಿನ ವಿಯಟ್ನಾಂ ವರೆಗೆ ನಮ್ಮ ವ್ಯಾಪಾರಿಗಳ ಬೃಹತ್‌ ನೌಕೆಗಳು ಲಂಗರು ಹಾಕುತ್ತಿದ್ದವು. ಈ ವ್ಯಾಪಾರ ವಹಿವಾಟು ಒಂದು ಸಾವಿರ ವರ್ಷಗಳ ಕಾಲ ನಡೆದು ಬಂದಿತ್ತು.

ಈಗ ಕಾರವಾರದಲ್ಲಿ ನಿರ್ಮಾಣಗೊಂಡ ನೌಕೆ ಕಾಂಡಿಣ್ಯವು ಮೊದಲ ಪ್ರಯಾಣದಲ್ಲಿ ಗುಜರಾತಿನಿಂದ ಹೊರಟು ಓಮನ್ ದೇಶಕ್ಕೆ ಹೋಗಲಿದೆ. ನಂತರದ ಹಂತಗಳಲ್ಲಿ ಹಿಂದೊಮ್ಮೆ ಎಲ್ಲೆಲ್ಲಿ ಭಾರತದ ವ್ಯಾಪಾರಿ ನೌಕೆಗಳು ಲಂಗರು ಹಾಕಿದ್ದವೋ ಅವೆಲ್ಲ ರೇವು ಪಟ್ಟಣಗಳಿಗೆ ಕೌಂಡಿಣ್ಯವು ಭೇಟಿ ನೀಡಲಿದೆ. ಆ ಕಾಲಖಂಡದಲ್ಲಿ ಜಗತ್ತಿನ ಉತ್ಪಾದನೆಯ (G.D.P) 34% ಭಾರತದ ಹತೋಟಿಯಲ್ಲಿದ್ದಿತು ಎಂದು ನೆನಪಾಗಬೇಕಿರುವ ಕಾಲವಿದು. ಚೀನಾದ ಪಾಲಿಗೆ ಆಗ ಇದ್ದುದು ಶೇಕಡಾ 26 ಭಾಗ ಮಾತ್ರ. ಪಶ್ಚಿಮ ಯೂರೋಪ್ ದೇಶಗಳ ಒಟ್ಟು ಉತ್ಪಾದನೆಯ ಮೂರು ಪಾಲಿನಷ್ಟು ಶ್ರೀಮಂತವಾಗಿದ್ದಿತು ನಮ್ಮ ಭಾರತ. ಒರಿಸ್ಸಾದ ಕಟಕ್ ಪ್ರದೇಶದಲ್ಲಿ ಬಲಿಯಾತ್ರೆಯೆನ್ನುವ ಉತ್ಸವವು ನಡೆಯುತ್ತದೆ. ಅದು ಬಲಿಮಹಾರಾಜನ ಸ್ಮರಣೆಗಾಗಿ ಅವನಿರುವ ಬಾಲಿದ್ವೀಪಕ್ಕೆ ಮಾಡುವ ಯಾತ್ರೆ ಅದು ಕಾರ್ತಿಕ ಪೂರ್ಣಿಮೆಯಂದು ನಡೆಯುವ ಕಾಲ. ಹಬ್ಬ. ಅಂದರೆ ಸಾಧಾರಣವಾಗಿ ನವಂಬರ್ ತಿಂಗಳಲ್ಲಿ ಜರುಗುವ ಉತ್ಸವ. ಮಾನ್ಸೂನು ಮಾರುತವು ತನ್ನ ದಿಕ್ಕನ್ನು ಬದಲಿಸಿ ಆತ್ಮೀಯ ಏಷಿಯಾ ಕಡೆಗೆ ಹೋಗುವ ನಾವೆಗಳಿಗೆ ಅನುಕೂಲಿಸುವ ವ್ಯಾಪಾರದ ಪ್ರಾರಂಭವೂ ಕೂಡಾ ನಮಗೆ ಹಬ್ಬವೆ. ಕೌಂಡಿಣ್ಯದ ಯಾನವು ಜಗತ್ತನ್ನು ಇಂತಹದೊಂದು ಉತ್ಸವಕ್ಕೆ ಕರೆಕೊಡುವ ನಾಂದಿ ಹಬ್ಬವಾಗಲಿದೆ.